:+:豉汁排骨蒸陳村粉:+: (附食譜)

話左好耐好耐要煮比陳大少試吓嘅:+:豉汁排骨蒸陳村粉:+:終於出場喇~!!!!

去開街街又番屋企前路經倫敦唐人街.... 醒起英國歡樂谷谷友仔推介嘅河粉廠..

當然要去入貨啦~~~

好耐之前喺香港時飲茶食過一次~~

陳大少鍾意嘅豉汁排骨... 豉汁排骨蒸飯... 豉椒排骨河粉.. 都係涼粉家晚餐嘅常客~~

咁呢個:+:豉汁排骨蒸陳村粉:+:...佢都應該會鍾意~~

買左大大包免切河粉就可以開工喇~!!!

材料及做法:

排骨 - 先啤水大約20分鐘.. 就係開住細細水喉咁樣~~
當然.. 如果想慳水啲就用浸啦~~

咁樣整出黎嘅排骨就會白雪雪架喇~~

排骨洗淨瀝乾後加入蒜蓉, 豆豉, 蠔油, 鹽, 糖, 麻油, 胡椒粉, 生粉

醃最少20分鐘~~

如果有時候醃過夜的話就要減少醃料份量喇~~

免切河粉切開大大片... 用手撕開~~

(真係唔懶得....因為疊埋一舊咁蒸出黎唔入味架~!!)

本身河粉嘅制作過程都係比較多油... 搣開一片片之後用清水或者滾水淋一淋佢更加好~~

又更加乾淨~~ 

醃好嘅排骨舖上陳村粉上面~

排骨唔好疊埋一堆堆... 咁蒸出黎就唔會有啲熟又啲唔熟喇~!!

攝氏100度蒸10分鐘至排骨全熟即可~~

為免蒸出黎太水汪汪... 可以加埋鍋蓋又或者係包微波爐保鮮紙都可以~~

蒸好後灑上蔥花... 淋上煮熱左嘅甜豉油就完成了~~~

再順手蒸埋大大碟菜就開飯了~~~

有人覺得呢味:+:豉汁排骨蒸陳村粉:+:簡直係驚喜之作~~

有人話: 排骨不嬲都係你拿手之作啦....陳村粉吸左排骨味之餘又唔會過腍 (河粉廠出品嘅河粉一直都係好高質素!!!) .. 睇佢個樣又估唔到佢咁夾啵... 呢個你得閒就可以整多啲~~

咁就太好了~~~ 呢個比豉椒排骨河少油啲又少啲功夫.. 真係連煲煲碟碟都洗少啲呀~~

食嘅食得開心.. 煮嘅都煮得開心~~~ 

嘻~~