2015年10月3日星期六

:+:番茄煮紅衫魚:+:(附食譜)+涼粉家晚餐 (03.08.2015)

番茄紅衫魚呢味餸~~涼粉子細個喺香港時就時時食~~

但係黎到英國後都唔多覺有紅衫魚賣~~

呢日去到中超見到魚檔有紅衫魚賣~~~ 梗係要入貨喇~~

其實之前買過急凍嘅~~~ 用黎煲番茄薯仔湯的確唔錯~~

(寶貝卡卡豬就最愛魚魚湯喇~!)


但係要整番茄紅衫魚.. 就梗係用新鮮架啦~~

新鮮係指係冰上面賣嘅~~~ 唔會係游水啦~~

紅衫魚好似係鹹水魚黎架嘛~~~ 

喺香港街市都冇見過有游水紅衫賣丫~~ 哈哈哈~~~

所以中超魚檔有得賣~~~ 都不知幾開心`!!!




材料及做法: 

紅衫魚- 兩條~ 

洗淨後用廚紙印乾水~~ 

加入鹽+胡椒粉內內外外抹勻最少醃10分鐘~


凍鍋凍油加入薑片大火加熱~~


薑片煎至金黃後加入紅衫魚~~

轉中火~

唔好反佢呀~~~ 佢表面煎香左就會自然唔痴鍋~~


反轉另一面再煎至金黃~

9成熟就可以上碟備用~


原鍋加入拍鬆咗嘅蒜頭~~

加入切咗角嘅番茄大火炒香~~~~


加入水~~ 茄汁+喼汁+鹽+糖調味~~

紅衫魚回鍋煮至少少收汁~~

想食辣可以加一隻指天椒~~ 呵~~


充滿童年回憶嘅番茄煮紅衫魚就完成喇~!!!!

酸咪咪夠晒開胃~~~ 連番茄都好好味~~


開飯了~!!


是日晚餐: 

翠玉瓜炒雲耳~~
泡椒蒜排骨~
番茄煮紅衫魚~


沒有留言:

發佈留言